Iqbal Shahid آج کل دا ای دلچسپ واقعہ اے، بلکہ وارننگ اے اُہناں بھراواں واسطے جہڑے اکھاں بند کرکے اے آئی دا استعمال کردے نیں۔
کل میں گوگل جیمنائی کولوں پچھیا کہ ایہ ساڈے نال مُلک وچ کی گھپ اے؟ جواب ملیا، کوئی مسئلہ نہیں، ایس کاکروچ پارٹی دا کوئی وجود نہیں، سب فرضی کہانیاں نیں۔
میں آکھیا، اے اک دن پہلاں تے تسی پوری لسٹ بنا کے دِتی سی سارے واقعات دی، نال سارے غیر ملکی اخباراں وچ چھپے تبصراں دا خلاصہ وی کیتا سی۔
جواب آیا کہ اُو میری مت ماری گئی سی، نہ تے کسے اخبار نے کُجھ لکھیا، نہ کوئی خبر ایس بارے چھپی، بس سمجھو مینوں مغالطہ لگ گیا سی۔
اچھا، مینوں چنگی بھلی خفگی ہوئی تے میں جا کے چیٹ جی پی ٹی اگے شکایت لائی کہ ایہ کم نے تُہاڈے لوکاں دے۔
چیٹ جی پی ٹی کہیا، حوصلہ رکھو، ہو جاندا اے۔
اے آئی نال وی کسے ویلے انج ہو جاندا، جہنوں تسی پنجابی وچ “گھوم جانا” تے انگریزی وچ Hallucination کہندے او۔ جا کے نویں ونڈو کھولو تے فیر پوچھو۔
میں دوبارہ پچھیا، نال سارے اخباراں دیاں خبراں دے سکرین شاٹ اپ لوڈ کیتے۔
شرمندہ جہیا ہو کے بہڑے دل نال جواب تے ملیا، پر نہ ہویاں جیہا۔
میں تحقیق کیتی تے چیٹ جی پی ٹی نے دسیا کہ ساڈے کم کرن دے دو طریقے نیں۔ یاں ساہنوں پوری معلومات ہوندی اے تے یاں فیر اسی اندازہ لانے آں یعنی (Pattern Recognition) کرنے آں
ایس دی مثال اس طرح اے کہ اک صاحب روز صبح تیار ہو کے دفتر جاندے نیں۔ تے فرض کرو کہ اک دن فیر اُو ٹائی شائی لا کے بابو بن کے باہر نکلے نیں، تے کوئی سائنوں پوچھے کہ صاحب کیتھے گئے نیں، تے اسی چنگا منہ پیڈا کرکے کہنا اے کہ صاحب دفتر گئے نیں، اُو پاویں مارکیٹ بچیاں دے پیمپر لین گئے ہون۔
اچھا، اے آئی نے خود ایس گل دی تصدیق کیتی کہ ساڈی تربیت دا حصہ اے کہ گل جو وی کرنی اے، پیر جوڑ کے کرنی اے۔ 😊
مطلب ایہ کہ اے آئی دی کیتی گل حرفِ آخر سمجھ کے من نہیں لینی۔ اک واری پوچھ لوو کہ ریفرنس دیو، تے سارا خلاصہ کھل جائے دا۔
دوجا اہم سبق ایہ اے کہ اے آئی کولوں چھوٹے دا کم لوو، اہدی مدد لوو، اہدے کولوں فیصلے نہ کراؤ، خاص طور تے تعلقات، رشتے داریاں دے مسئلے۔ اہدا اپنا انگریزی حساب اے۔ اہدی من کے اپنی بی بی نال “باونڈریز” بنا کے نہ بیٹھے ہووئیے!
مکدی گل ایہ اے کہ اے آئی نوں مشیر سمجھنا اے، منصف نہیں!
