لاجواب

حاکماں دی نری کارکردگی ای بے مثال نہیں۔ انہاں دیاں گلاں وی لاجواب نے۔ گورنر پنجاب کولوں کسے صحافی نے پچھیا کہ جدوں وی کوئی المناک حادثہ ہو جائے، تاں اکثر اوہدے وچ غریباں دے بچے ای کیوں مردے نے؟

گورنر صاحب نے کھرا جواب دِتا کہ ایہہ گل تسی رب کولوں جا کے پچھو۔ پر جے اساں کوئی گل رب کولوں پچھنی ہووے، تے فیر تے اسی ایہ پچھا گے کہ ربا سچیا، ساڈے کولوں کی ایسی خطا ہو گئی اے کہ ساڈے تے ایہہ نااہل تے سنگ دل لوک حاکم بن کے پے گئے نے۔

پر گورنر صاحب کولوں وی سوہنا جواب وفاقی وزیرِ صحت مصطفیٰ کمال نے دتا۔ جدوں اُہناں کولوں پچھیا گیا کہ کیا تسی پمز دے المناک سانحے تے استعفیٰ دیو گے؟ اُناں کہا، میں کیوں استعفیٰ دیواں؟ ایہہ ہسپتال چلانا کوئی میری ذمہ داری اے؟ میں وزیر آں۔ میرا کم پالیسیز بنانا اے۔

گل تاں دل نوں لگدی اے۔ پر فیر اوس پمز دے ایگزیکٹو ڈائریکٹر دا کی قصور؟ جیہدے اُتے ٹھوک کے پرچہ دینے دا حکم ہو گیا اے۔ اوہ وی کہہ سکدا اے جی کہ میں ہسپتال دے وچ کوئی وارڈ انچارج یا سکیورٹی افسر تاں نہیں لگیا ہویا۔ اتے جے سکیورٹی افسر کولوں پچھو، تاں اوہنے اکھنا اے کہ میں کوئی الیکٹریشن ہاں۔

گل آخر جا کے اوہناں تاراں اُتے مکنی اے، جیہڑیاں نہایت غیر ذمہ داری دا ثبوت دیندیاں، گلے سڑے ربڑ دے وچوں باہر نکلیاں۔ اک دوجیاں وچ گتھم گتھا ہوئیاں تے آگ بن کے بل پیاں۔ سچی گل اے، اس حادثے دی ذمہ داری اُس چنگاری تے ای اے، جنے وارڈ دے وچ بھانبھڑ مچا دِتا۔ اس چنگاری نوں ہُن بھاویں سسپینڈ کر لو یا بھاویں ایس تے پرچہ دے لو۔

اُو ایس لئی کہ اس ملک وچ ذمہ داری لین دا رواج کتھے وے، کہ مصطفیٰ کمال جھنڈے والی گاڑی وچوں نکل کے سڑک سوار ہو جائے۔

ایہ انڈیا تھوڑا اے، جتھے ریل دے حادثے اُتے ریلوے دا وزیر گھر چلا جائے، یا ایہ برطانیہ اے، جتھے معیشت خراب ہون تے وزیرِاعظماں دیاں استعفیاں دی لائن لگ جائے۔ پاکستان وچ ہر کوئی حاضر جواب اے، تے دوجیاں نوں لاجواب کرن لئی تیار بیٹھا اے۔

مکدی گل اے وے کہ دنیا دا کوئی وی مُلک ہووے، جواب دیندا کوئی وی نئیں، جواب لیا جاندا اے۔ اتے جے لوکاں دے وچ جواب لین دا ساہ ہووے، جواب لین دی طاقت ہووے، تاں فیر بھلیاں بھلیاں نوں جواب دینا پیندا اے۔

پر پاکستان دے وچ اجے ایہ منزل دور اے تے پینڈا بہت اے، تے جدوں تک لوگ جواب منگن جوگے نہیں ہو جاندے، ہر گل رب تے ای پائی جاؤ!