لا وارث بنجاب تے لاتعلق حاکم

گل سمجھ تک ای ہوندی اے تے جے گل نوں پُٹھ لا کے اوہدا کج دا کُج بنا دئیے تے ایہ وی ٹھیک نئیں ہوندا۔

تسی ساریاں نے سُن ای لیا ہونا اے کہ پنجاب دی وزیرِ اعلیٰ مریم نواز شریف صاحبہ نے کس طرح اپنے آپ نوں دل توں روح تک کشمیری آکھیا اے۔

گل اے نئیں کہ مریم نواز شریف نے اپنے آپ نوں کشمیری کیوں آکھیا اے؟ جدوں اوہ خاتون کشمیری نے، پورا خاندان کشمیری اے تے اپنے آپ نوں کشمیری ای آکھن دے ناں!

کسے دے کشمیری ہون تے پنجاب دے وچ رہن دا وی کوئی مسئلہ نئیں۔ کشمیر توں آون آلے لوک کنے ورے پہلاں پنجاب وچ آباد ہوئے تے پنجابی بن کے رہے، ہون تے اُہناں دیاں نسلاں اپنیاں مادری زباناں، ڈوگری، گوجری تے کشمیری تک بھل چکیاں نے۔

مسئلہ کسے دے پنجابی یا کشمیری ہون دا ہے ای نئیں، مسئلہ حاکماں دی اس عادت دا اے جِدے پاروں اوہ اپنی ضرورت تے موقعے دے حساب نال اپنا بیان بدل لیندے نیں۔

زیادہ چِر پُرانی گل نئیں جدوں مریم صاحبہ نے پنجاب وچ تقریر کر دیاں آکھیا سی کہ “میں بلیو بلڈڈ پنجابی آں۔” ہون ایہ نہ آکھنا کہ خون تے لال رنگ دا ہوندا اے۔ تسی سارے سمجھدے او کہ اے محاورا اے۔ جدوں کوئی اپنے آپ نوں “بلیو بلڈڈ پنجابی” آکھدا اے تے اوہدا مطلب ہوندا اے کہ اوہ نسلی تے اپنے خون دے حساب نال پکا پنجابی اے، تے ماڑا موٹا وی نئیں، اعلیٰ نسل دا پنجابی اے۔ “ بلیو بلڈڈ” دا مطلب کجھ اینج دا ہی ہوندا اے۔

فیر چند مہینیاں بعد ای، دو دن پہلے کشمیر دے انتخابی جلسے وچ آکھیا کہ “میں خون سے بھی کشمیری ہوں، دل سے بھی کشمیری ہوں، دماغ سے بھی کشمیری ہوں۔”

اے اُوس شخص دے الفاظ نے جہڑا پنجاب دے  بدنصیب صوبے دا حاکم تے اُہدی سب توں اُچی کرسی تے بیٹھا ہویا اے، اک ایسا صوبہ جدے نصیب وچ اپنی دھرتی دے جمندرو، تے سینکڑاں ہزاراں نسلاں توں اتھے آباد دھیاں پتران وچوں کسے دی حکمرانی لکھی ہی نہ گئی۔

اس خطے نے ہمیشہ اپنے آپ نوں دوجے علاقیاں نال تے دوجیاں نسلاں نال جوڑن والیاں دی حکمرانی ہی ویکھی اے۔تُرک غلام قطب الدین ایبک توں لے کے نادر شاہ دی لوٹ مار تے احمد شاہ ابدالی دیاں لشکرکشیاں تک! تے فیر مغل حکومتاں توں انگریزاں تک، سب آئے  پنجاب اُتے حکومت کیتی تے چلے گئے۔ پھر نواں دور آیا، نویاں حکومتاں آئیاں، پر پنجاب دی قسمت نئیں بدلی۔ پاویں اس دی لسٹ بنا کے ویکھ لوو کِنّا چِر پنجابی نسل دے لوگ اپنے صوبے دے خود حاکم رہے تے تواہنوں سارا اندازہ ہو جائے گا!

جنہاں نے پنجاب تے حکومت کیتی، اوہناں نے نہ تے پنجاب نوں اپنایا تے نہ ای پنجاب دی زبان، کلچر، وسوں تے پنجابی شناخت نوں مان دتا۔

اسی ایہ نئیں آکھدے کہ مریم صاحبہ اپنے آپ نوں کشمیری ناں آکھن۔ لکھ تے ہزار وار آکھن، پر اک تے اپنا بیان اک رکھن۔ خاص طور تے خون ورگی شے، جڑی آسانی نال بدلدی نئیں، جیدا رنگ وی موسم، خاص طور تے انتخابی موسم دے نال تبدیل نئیں ہو سکدا۔

ساڈی عرض تے ایہ وی اے کہ جس صوبے دے حاکم بن کے بیٹھے او، اوہدی زبان، اوہدے کلچر تے اوہدی شناخت دا وی کجھ خیال کرو۔ جے اوہدی شناخت اپنانی اے، تے پکّی کر کے اپناؤ۔

جتھے ہور سارے صوبیاں وچ اتھوں دے مقامی لوگ ہی حکومت کر رہے نیں، تے پنجاب کیہڑا کوئی کالونی دور وچ جی رہیا اے، جتھے اپنی شناخت نوں باہر کدرے جوڑن آلے لوگ حاکم بن کے بیٹھے رہن۔ اتھے پنجابی بن کے رہنا تے پنجابی بن کے ہی حکومت کرنی پے گی۔